Որքանո՞վ ենք վստահում իրավապահ մարմիններին, այդ թվում՝ ԱԱԾ-ին, որը ժամանակին ոչ պակաս մասնակցություն և պատասխանատվություն է ունեցել հենց Հոկտեմբերի 27-ի հետ կապված
«Բոլոր հիմքերը կան կարծելու, որ որոշակի չափով տեղեկատվություն Նաիրի Հունանյանը կարող էր փոխանցել, բայց ես կարծում եմ, որ Հունանյանն ընդամենը գործիք է եղել և չունի ամբողջական ցանկը Հոկտեմբերի 27-ի ոճրագործության մասնակիցների, ներգրավվածների, որով հնարավոր է բացահայտել Հոկտեմբերի 27-ի գործը: Նաիրի Հունանյանի նամակը՝ հասցեագրված վարչապետին, իր մեջ կարող էր ամեն ինչ պարունակել՝ օգտակար տեղեկատվություն, սեփական կյանքը փրկելու, ազատության կոչ, կարող էր լինել նաև սուտ տեղեկատվություն: Ոչինչ էլ չի բացառվում: Կարծում եմ, որ իրավապահ մարմինները պիտի զբաղվեն այս գործով, բայց այստեղ ուրիշ խնդիր կա, այսինքն որքանո՞վ ենք վստահում իրավապահ մարմիններին, այդ թվում՝ ԱԱԾ-ին, որը ժամանակին ոչ պակաս մասնակցություն և պատասխանատվություն է ունեցել հենց Հոկտեմբերի 27-ի հետ կապված: Այդ ժամանակահատվածում Սերժ Սարգսյանն էր Ազգային անվտանգության ծառայության ղեկավարը»,- ԳԱԼԱ-ի հետ զրույցում նման կարծիք հայտնեց իրավապաշտպան Նինա Կարապետյանցը՝ անդրադառնալով Հոկտեմբերի 27-ի գործի անջատված մասով քննությանը և գործով առանցքային մեղադրյալ Նաիրի Հունանյանի նամակին՝ ուղղված վարչապետին:Նինա ԿարապետյանցԸստ իրավապաշտպանի՝ այդ ժամանակներից մինչև օրս այս կառույցում բարեփոխում, լյուստրացիա, անցումային արդարադատություն տեղի չի ունեցել, և հույս ունենալ, որ այս կառույցը կբացահայտի գործն ամբողջ ծավալով, անհավատալի է: «Նման իրադարձություններից հետո բոլոր նորմալ երկրներում ԱԱԾ ղեկավարը հրաժարական պիտի տար, բայց մեր երկրի պարագայում այլ էր: Սերժ Սարգսյանը ոչ միայն հրաժարական չտվեց, այլ նաև առաջընթաց ունեցավ հետագայում՝ դառնալով երկրի նախագահ: Եվ այս պայմաններում որքանո՞վ են պահպանվել տեղեկությունները, որքանո՞վ են պահպանվել ապացույցները, իսկ եթե դիտարկենք այն ֆոնին, որ փաստաթղթեր են կորչում, և որևէ մեկը մինչ օրս դրա համար պատասխանատվության չի ենթարկվել: Կասկածի տակ եմ դնում, որ այդ կառույցն այսօր առանց լյուստրացիայի, փոփոխությունների, գործ կբացահայտի»,- նշեց իրավապաշտպան Նինա Կարապետյանցը:
«Մենք պետք է հասկանանք՝ նախկինում ով ում է ծառայել այս տարիների ընթացքում, պիտի հասկանանք՝ կա՞ն արդյոք գործակալներ, թեև շատերի մոտ կասկածը փարատված է: Իմ խորին համոզմամբ՝ ԱԱԾ նախկին պետ Արթուր Վանեցյանն ուղղակի գործակալ է. իր գործունեությունը, աշխատանքից ազատվելն ու Ռուսաստան մեկնելը, որոշակի ակտիվությունն ինձ համար ապացույց է, որ նա գործակալ է»,- ավելացրեց Կարապետյանցը:
ԳԱԼԱ-ի հարցին, թե արդյոք կլինի արդար քննություն, և կարճված գործի վերաքննման արդյունքում կլինե՞ն նոր բացահայտումներ, կհրապարակվե՞ն նոր անուններ, Կարապետյանցը պատասխանեց. «Ես չեմ սպասում նոր անունների, նոր բացահայտումների: Այս պայմաններում, այս ելակետային տվյալները, որը մենք ունենք, որևէ բացահայտում ես չեմ սպասում: Ավելին, ես սպասում եմ, որ այն ամեն ինչը, որը հնարավոր կլինի կոծկել, նորից կոծկելու են. այս պարագայում Հոկտեմբերի 27-ի գործից անջատված մասը նորից քննելը ճիշտ որոշում չեմ համարում»:
ԳԱԼԱ-ի այն դիտարկմանը, որ Հոկտեմբերի 27-ի մասով ներքաղաքական դրդապատճառների, արտաքին ուժերի միջամտության և այլ գործոնների մասին կարծիքներ են շրջանառվում, և այս պարագայում ինչո՞ւ է գործի քննությունը դոփում տեղում, միգուցե և՛ նախորդ, և՛ ներկա իշխանությունները կաշկանդված են ինչ-որ առումով, իրավապաշտպանն արձագանքեց. «Ձգձգումների պատճառն այն է, որ ներգրավված են եղել պետական կառույցներ, այդ թվում՝ ԱԱԾ-ն, բարձրաստիճան պաշտոնյաներ, ովքեր մինչև հիմա աշխատում են համակարգերում կամ մեծ ազդեցություն ունեն այդ համակարգերի վրա, և այդ պայմաններում բացահայտման սպասելը միամտություն է: Հոկտեմբերի 27-ի գործի հետ առնչվող խոսակցությունները, բոլոր տարբերակները կյանքի իրավունք ունեն, որովհետև հասկանալի է, որ այն ուժերը, որոնք հաջորդեցին Հոկտեմբերի 27-ին, ոչ ժողովրդավարական էին, ոչ էլ գործել են հանուն Հայաստանի Հանրապետության, շատ դեպքերում անգամ նաև ՀՀ շահերին դեմ են գործել:
Կանխատեսելը դժվար կլինի՝ թե ինչ կարող էր լինել և ինչ կանխվեց Հոկտեմբերի 27-ի ոճրագործությամբ, բայց որ Հայաստանն ուներ շանս՝ դառնալու ավելի անկախ և զարգացած պետություն, մենք ունեինք բավականին իմաստուն, փորձառու ղեկավար, մենք ունեինք Կարեն Դեմիրճյան, Վազգեն Սարգսյան: Այսինքն՝ առաջընթացի հարցում մեծ էր շանսը»:
«Հաշվի առնելով, թե ինչ տեղի ունեցավ Հոկտեմբերի 27-ից հետո, ովքեր եկան իշխանության, ով շահեց Հոկտեմբերի 27-ից, եթե հաշվի առնենք նախորդ իշխանության հլու-հնազանդ ենթարկվելը Ռուսաստանի Դաշնությանը, այո՛, ես կարծում եմ, որ Ռուսաստանը որոշակի շահեր կարող էր ունենալ, եթե չասեմ՝ մասնակցություն: Արտերկրի միջամտությունը Հայաստանի համար ամենամեծ մարտահրավերներից մեկն է»,- եզրափակեց Կարապետյանցը:
Հիշեցնենք, որ 2019թ. տարեվերջին ՀՀ գլխավոր դատախազությունը բավարարել էր Հոկտեմբերի 27-ի գործով տուժողի իրավահաջորդ Անահիտ Բախշյանի բողոքն առ այն, որ Հոկտեմբերի 27-ի գործից անջատված մասը վերաբացվի:
Հիշեցնենք, որ 1999թ. հոկտեմբերի 27-ին ոճրագործների խումբը` Նաիրի Հունանյանի գլխավորությամբ, ներխուժել էր ՀՀ Ազգային ժողովի նիստերի դահլիճ և սպանել ԱԺ խոսնակ Կարեն Դեմիրճյանին, վարչապետ Վազգեն Սարգսյանին, փոխխոսնակներ Յուրի Բախշյանին և Ռուբեն Միրոյանին, օպերատիվ հարցերով նախարար Լեոնարդ Պետրոսյանին, պատգամավոր Արմենակ Արմենակյանին, Հենրիխ Աբրահամյանին և Միքայել Քոթանյանին: Ահաբեկիչների նկատմամբ դատական գործը սկսվեց 2001թ. փետրվարին և տևեց մինչև 2003թ. դեկտեմբերը:
