Որպես կորոնավիրուսի դեմ պայքարի միջոց օգտագործվող հավելվածն արդեն փորձարկումներ է անցնում նաև Վրաստանում. նախարար
Տարբեր երկրներում որպես կորոնավիրուսի դեմ պայքարի միջոց օգտագործվող հավելվածն արդեն փորձարկումներ է անցնում նաև Վրաստանում: Այս մասին տեղեկացնում է pia.ge կայքը` հղում անելով Վրաստանի առողջապահության նախարար Էկատերինե Տիկարաձեին:Առողջապահության նախարարի խոսքով՝ հավելվածն ակտիվացնելուց հետո քաղաքացիները տեղեկություններ կստանան այն մասին, թե արդյոք իրենք շփվել են վարակված մարդու հետ: Հավելվածը կտեղեկացնի նաև այն վայրերի մասին, որտեղ կորոնավիրուսով վարակված անձինք են եղել:
«Մենք ծրագրում ենք լրացուցիչ տեղեկություններ հաղորդել հասարակությանը հավելվածի մասին: Ներկա դրությամբ սա միայն թեստային ռեժիմով է արվում, և մենք արդեն համոզվել ենք, որ հավելվածն իրոք արդյունավետ կլինի, այն հարմարվում է վրացական իրականությանը և տեղեկատվական մեծ բազաներ ունի: Մենք պատրաստ ենք քաղաքացիներին տեղեկացնել այս հավելվածի մանրամասների մասին, որպեսզի նրանք կարողանան հետևել իրենց առողջությանն ու անվտանգությանը, իմանան, թե որտեղ են վարակվել կորոնավիրուսով, և արդյոք նրանք անձնապես շփվել են վարակված մարդու հետ: Սա կօգնի նաև հիվանդությունների վերահսկման կենտրոնների համաճարակաբաններին»,-հայտարարել է Տիկարաձեն:
Վերջին տվյալներով՝ Վրաստանում կորոնավիրուսով վարակման դեպքերի թիվը հասել է 130-ի, 26 մարդ առողջացել է:
