Հայաստանում հաստատվել է կորոնավիրուսով վարակվելու 374, մահվան՝ 3 նոր դեպք          Որ աշակերտներն այսուհետ կարող են դիմակ չկրել. Նոր որոշում է ստորագրվել       Ավելի լավ է կաշառք վերցնեն, բյուջեից փող ուտեն, կոռուպցիոն գործարքների մեջ ներգրավվեն, քան ինֆորմացիա հանեն ներսից. «Հրապարակ»    

06 օգոս 2020 15:55

Բեյրութում աճում է զայրույթը. նախազգուշացրել էին, որ եթե 2750 տոննա ամոնիումի նիտրատը չհեռացվի, ապա կպայթեցնի ամբողջ Բեյրութը

Բրիտանական հեղինակավոր The Guardian պարբերականն անդրադարձել է օգոստոսի 4-ին Լիբանանի մայրաքաղաք Բեյրութի նավահանգստում տեղի ունեցած հզոր պայթյունին, որի պատճառով զոհվել է առնվազն 135 մարդ, վիրավորվել են հազարավոր մարդիկ, հարյուր հազարավորներ անօթևան են մնացել:

Պարբերականը նկատում է, որ ողբերգական դեպքից հետո Բեյրութում աճում է զայրույթն ու դժգոհությունն ընդդեմ իշխանությունների. վերջիններս խոստովանել են, որ սոսկալի պայթյունն իրականում կանխատեսելի էր, ու դրա վերաբերյալ անընդհատ նախազգուշացումներ էին արվում:

Աղբյուրը հիշեցնում է, որ պայթյունի պատճառ դարձած ահռելի քանակությամբ (2750 տոննա) ամոնիումի նիտրատը, որը նկարագրվում էր որպես «լողացող ռումբ», Բեյրութի նավահանգստում էր պահվում արդեն վեց տարի: Հատկանշական է, որ կես տարի առաջ պահեստը ստուգող պաշտոնյաները նախազգուշացրել են, որ եթե այն չհեռացվի, ապա «կպայթեցնի ամբողջ Բեյրութը»:

«Բացահայտումն առ այն, որ կառավարության անտարբերությունը կարող է էական դեր ունենալ Բեյրութի պատմության մեջ ամենասարսափելի պայթյունի հարցում, ժողովրդի շրջանում բարկության նոր ալիք է բարձրացրել երկրի քաղաքական դասի նկատմամբ»,-գրում է պարբերականը՝ նկատելով, որ ժողովուրդն առանց այդ էլ դժգոհ էր կառավարությունից՝ շարունակվող տնտեսական ճգնաժամի և դրա հետևանքով Լիբանանի բնակչության գրեթե կեսի չքավորության մեջ հայտնվելու պատճառով:

«Այն, ինչ կատարվեց, «կոմպետենտ» մարդկանց ոչ կոմպետենտության հետևանք է: Եվ դեռ քանի՞ այսպիսի աղետներ են մեզ սպասվում: Չունենք էլեկտրականություն, ջուրը թունավորված է, մթերքը՝ կասկածելի, ամենուր զենքեր են: Նրանք գողացան մեր փողերն ու մեր երեխաների ապագան»,-նշել է հայտնի լիբանանցի գիտնական Ստեֆան Բազանը:

Մեկնաբանություններ

Համընկնող լուրեր