Բացվեց «Ջավախք» հայրենակցական միության նոր գրասենյակը
Հունվարի 26-ին տեղի ունեցավ «Ջավախք» հայրենակցական-բարեգործական ՀԿ-ի նոր գրասենյակի բացման հանդիսավոր արարողությունը։ Միջոցառմանը մասնակցում էին բազմաթիվ հյուրեր՝ ինչպես Երևանից, այնպես էլ Ջավախքից։ Բացման արարողությանը ներկա էին ծագումով ջավախքցի ՀՀ կառավարության անդամները, ՀՀ Ազգային ժողովի պատգամավորները, կրթության, գիտության և մշակույթի գործիչներ, լրագրողներ, կազմակերպության ակտիվիստներ և այլոք։ «Ջավախք» հայրենակցական-բարեգործական միության նոր գրասենյակի բացման արարողության ժամանակ խոսքով հանդես եկավ ՀՀ ազգային ժողովի պատգամավոր, «Ջավախք» հայրենակցական միության նախագահ Շիրակ Թորոսյանը։ Նա ներկաներին մանրամասն ներկայացրեց կազմակերպության վերջին տարիների կատարած աշխատանքը, և խոսեց հետագա անելիքների մասին։
Կարևորվեց կազմակերպության ակտիվ դերակատարումը հայ-վրացական բարեկամական հարաբերությունների զարգացման և Մայր հայրենիք-Ջավախք բազմակողմանի կապերի պահպանման և ամրապնդման գործում։
«Ջավախք» հայրենակցական միության նոր հասցեն է՝ Արշակունյաց 4, 2-րդ հարկ (Մամուլի շենք):
