Չի կարելի ժամանակ կորցնել.կորոնավիրուսի դեմ 2-րդ պատվաստման կոչ է արվում
Եվրամիությունը երկուշաբթի օրը հայտարարել է, որ չափազանց կարեւոր է, որ դաշինքի 27 երկրների իշխանությունները քննարկեն կորոնավիրուսի դեմ երկրորդ պատվաստման անցկացումը 60-79 տարեկան անձանց եւ բնակչության այլ խոցելի խմբերի համար, քանի որ համավարակի նոր ալիքը տարածվել է մայրցամաքում, հաղորդում է Associated Press-ը:«Քանի որ հիվանդության ու հոսպիտալացման դեպքերի թիվը կրկին աճում է ամառային սեզոնին զուգընթաց, ես բոլորին կոչ եմ անում հնարավորինս շուտ պատվաստվել եւ վերապատվաստվել։ Չի կարելի ժամանակ կորցնել»,- ասվում է Առողջապահության եւ սննդի անվտանգության հարցերով եվրահանձնակատար Ստելլա Կիրիակիդեսի հայտարարության մեջ:
Հիվանդությունների կանխարգելման եւ վերահսկման եվրոպական կենտրոնը եւ Դեղամիջոցների եվրոպական գործակալությունը հայտարարել են, որ երկրորդ պատվաստումը կարելի է անցկացնել առաջինից ոչ շուտ, քան չորս ամիս անց։
Երկուշաբթի օրը հրապարակված խորհուրդը հայտնվել է այն բանից հետո, երբ գործակալությունները ապրիլին կոչ են արել դիտարկել 80-ն անց անձանց համար երկրորդ ռեվակցինացիայի հնարավորությունը:
«Քանի որ Եվրոպայում այժմ վերակենդանացման բաժանմունքներում հոսպիտալացումների նոր ալիք է դիտարկվում, շատ կարեւոր է, որ առողջապահական իշխանությունները մտածեն 60-79 տարեկանների, ինչպես նաեւ ցանկացած տարիքի խոցելի անձանց կրկնակի ռեվակցինացիայի մասին»,- ասվում է գործակալության հայտարարության մեջ։
Հիվանդությունների կանխարգելման եւ վերահսկման եվրոպական կենտրոնի տնօրեն Անդրեա Ամմոնն ասել է, որ նոր ալիքը պայմանավորված է կորոնավիրուսի օմիկրոն տարբերակի BA.5 մուտացիայով, որը շուտ է տարածվում։
Երկուշաբթի ԵՄ-ն խորհրդատվություններ է տվել, քանի որ գիտնականները մտահոգված են օմիկրոն շտամի նոր՝ BA2.75 մուտացիայով, որը թափ է հավաքում Հնդկաստանում եւ ի հայտ է գալիս այլ երկրներում:
Գիտնականներն ասում են, որ նոր տարբերակը կարող է արագ տարածվել եւ շրջանցել պատվաստանյութերից ու նախորդ վարակներից ստացած իմունիտետը: Դեռ պարզ չէ, թե կարող է արդյոք այն ավելի լուրջ հիվանդություններ առաջացնել, քան օմիկրոնի մյուս տարբերակները, ներառյալ աշխարհում հայտնի BA.5-ը:
