Բայդենը հանդես է եկել անսպասելի հայտարարությամբ. Իրանի նախագահը պատասխանել է
ԱՄՆ նախագահ Ջո Բայդենը հայտարարել է, որ Իրանը շուտով «ազատ» կլինի:Ինչպես գրում է Bloomberg-ը, նա այս մասին ասել է նախընտրական հանրահավաքի ժամանակ, բայց չի հստակեցրել, թե ինչ է նկատի ունեցել «ազատ» ասելով:
Աղբյուրը գրում է, որ Բայդենը վետերանների խնամքը բարելավելու նպատակով իր վարչակազմի ջանքները ներկայացնելու ժամանակ, կանգ է առել և ասել. «Մի՛ անհանգստացեք, մենք ազատելու ենք Իրանը»:
Ապա արագ հավելել է. «Նրանք շուտով կազատեն իրենց»:
Իրանի նախագահ Էբրահիմ Ռաիսին այս հայտարարությանը պատասխանել է 1979 թվականին Թեհրանում իսլամական հեղափոխության կողմնակիցների կողմից ԱՄՆ դեսպանատան գրավման 43-րդ ամյակի կապակցությամբ ելույթում:
«Իրանն ազատվել է 43 տարի առաջ և վճռական է չընկնել ձեր գերության մեջ»,- ասել է նա։
Իրանում ավելի քան մեկ ամիս է, ինչ զանգվածային բողոքի ցույցեր են այն բանից հետո, երբ Մահսա Ամինին անունով երիտասարդ կինը մահացել է ոստիկանական բաժանմունք տարվելուց հետո:
22-ամյա Ամինին մահացել է սեպտեմբերի 16-ին կոմայի մեջ ընկնելուց հետո: Այսպես կոչված «բարոյականության ոստիկանությունը» նրան ձերբակալել էր այն բանի համար, որ նա իր ընտանիքի հետ Թեհրան մեկնելիս խախտել է իսլամական հագուստի կանոնները:
ԱՄՆ-ն զանգվածային ցույցերի պատճառով դադարեցրել է Իրանի կառավարության հետ բանակցությունները, որոնք ուղղված էին երկրի միջուկային ծրագրի վերաբերյալ համաձայնագրի վերականգնմանը:
