Չեմ բացառում, որ կլինեն ռազմական գործողություններ․տարածաշրջանում մեծ պատերազմի որոշումը կայացվելու է ԱՄՆ-ում, Մեծ Բրիտանիայում
Հոկտեմբերի 23-25 Ադրբեջանում տեղի ունենալիք թուրք-ադրբեջանական հերթական զորվարժությունը չի բացառվում, որ նախերգանքը լինի Հայաստանի դեմ հերթական ռազմական ագրեսիայի, Aysor.am-ի հետ զրույցում նշում է ռազմական փորձագետ Հայկ Նահապետյանը: «Ամեն հերթական զորավարժություն կարող է վերածվել պատերազմի, իհարկե, պետք է զգոնությունը բարձրացնել՝ հաշվի առնելով, որ այս զորավարժությունները տեղի են ունենալու Նախիջևանում, Արցախի օկուպացված տարածքներում՝ Թուրքիայի հետ համատեղ: Այնուամենայնիվ, մեծ պատերազմ սանձազերծելը Ադրբեջանի որոշումը չի լինելու, ավելին՝ Թուրքիան էլ չի հիմնական որոշողը. տարածաշրջանում մեծ պատերազմի որոշումը կայացվելու է ԱՄՆ-ում, Մեծ Բրիտանիայում»:
Հայկ Նահապետյանի գնահատմամբ՝ Իրանը, Ռուսաստանը հետամուտ են տարածաշրջանում իրենց շահերի սպասարկմանը, այնպես որ, Ալիևը չի կարող իրեն թույլ տալ ինքնուրույն մեծ պատերազմի սանձազերծման որոշում կայացնել:
Նահապետյանը նաև չի բացառում, որ այս զորավարժություններն Ալիևի կողմից ուժի կիրառման ուղերձ են հոկտեմբերին սպասվող բանակցություններին ընդառաջ՝ Հայաստանից ավելին ստանալու նպատակադրմամբ:
«Այդուհանդերձ, ես նաև չեմ բացառում, որ ռազմական գործողություններ կարող են լինել, բայց դա նշանակում է, որ այդ գործողություններին ուղղակիորեն ներգրավվելու են Իրանը և Ռուսաստանը: Հարց է՝ եթե անգամ Ալիևը հավաքական արևմուտքից նման հրաման ստացած լինի, արդյո՞ք Ադրբեջանը կգնա այդպիսի արկածախնդրության: Ալիևը գիտակցում է, որ կարող է լրջագույն կորուստներ ունենալ: Այնուամենայնիվ, պետք է փաստել, որ Ալիևը որդեգրել է փոքր քայլերի քաղաքականություն, որն արտահայտվեց 44-օրյա պատերազմից հետո աստիճանաբար ճնշումներ գործադրելով, դաշնակիցների լծակներն օգտագործելով Հայաստանի դեմ, Եվրոպական երկրների՝ Հայաստանին աջակցելու ցանկության չեզոքացմամբ՝ Եվրամիության երկրների հետ գազային-նավթային պայմանագրերի քանակը մեծացնելով: Ադրբեջանի քաղաքական-դիվանագիտական զինանոցը բավական մեծ է, լուրջ, փորձառու մարդիկ են զբաղված քաղաքականությամբ՝ ի տարբերություն Հայաստանի. այս պահին չափելի չեն Հայաստանի ռազմական, քաղաքական, դիվանագիտական ջանքերը»:
Ռազմական փորձագետն ասում է՝ հարցրեք Փաշինյանին և Պապիկյանին, թե ինչու Հայաստանը զորավարժություններ չի անում: «Ի վերջո, զորավարժությունները հնարավորություն են զորակոչված անձնակազմի մարտական պատրաստությունը, ոգին բարձրացնելու, զորքերի ներդաշնակման, նորագույն տեխնիկային տիրապետելու հմտությունները բարելավելու: Գուցե, Փաշինյանը համարում է, որ Ադրբեջանին կարող է զսպել Եվրախորհրդարանի ամբիոնից մանիպուլատիվ, կեղծ տեղեկություններ տարածելո՞վ»:
.jpg)
