Տեսանյութ. Նեղ բիզնես շահերի պաշտպանության արդյունքում Սևանա լճի մակարդակի ավելացման տեմպերը ցածրացել են
Հայացք մամուլի ակումբում ՀՀ ԳԱԱ Քիմիական ֆիզիկայի ինստիտուտի ավագ գիտաշխատող, ջրային էկոհամակարգերի մասնագետ Սեյրան Մինասյանը խոսեց
Սևանա լճի էկոհամակարգի և լճից ջրառի խնդիրների շուրջ:Սեյրան Մինասյանը նշեց, որ վերջին
6 տարում Սևանա լճի բացասական բալանս է նկատվել 3 անգամ՝ 2012-ին, 2014-ին, 2017–ին. «Նախորդ տարի բացասական բալանսը կազմել է 4 սանտիմետր։ Նման իրավիճակ կստեղծվի նաև այս տարի,
եթե հաշվի առնենք նախատեսվող 40 միլիոն խորանարդ մետր լրացուցիչ ջրառը։ Ինչպես նախորդ տարի, դա բացատրվում է ոռոգման ջրի պակասով, սակայն իրականում այստեղ բացասական դեր են խաղում ՀԷԿ–երը, որոնց աշխատանքի համար օգտագործվում է ջրամբարների ջուրը։ Օրինակ՝ Մարմարիկի ջրամբարից մարտ ամսին ջուր են բաց թողել,
երբ ոչ մի հողատարածքի ոռոգման մասին խոսք լինել չէր կարող։ Մարտ ամսին այդ ի՞նչ էին ոռոգում Հրազդանում: Այս ամենը կազմակերպված սաբոտաժ է պետական շահերի դեմ՝ ընդհանուր առմամբ և գյուղատնտեսության դեմ՝ մասնավորապես: Արդյունքում տարեցտարի նկատվում է ջրամբարներում ջրի պակաս, նույնիսկ ջրի կուտակման համար բարենպաստ պայմաններում, ասաց Սեյրան Մինասյանը, հավելելով, որ նաև ոռոգման ջրի նման գերծախսը սարսափելի մասշտաբներով է իրականացվում։
Ըստ Սեյրան Մինասյանի Սևանա լճի մակարդակի ավելացման տեմպերը շատ ցածր են և հանդիսանում են նեղ բիզնես շահերի պաշտպանության արդյունք. «Եթե 2002-2012 թթ.–ին Սևանի մակարդակը բարձրացել է 3.5 մետրով, ապա 2012–ից առ այսօր՝ ընդամենը 25 սանտիմետրով։ «Այս գործընթացը իրականացվում է Ջրպետկոմի և Սևանա լճի պահպանության փորձագիտական հանձնաժողովի (Հայաստանի գիտությունների ազգային ակադեմիա) ձեռքով»,–հայտարարեց նա։
Անդրադառնալով Սևանա լճի ջրահավաք աշխատանքներին Սեյրան Մինասյանը ուշադրության արժանացրեց այն փաստը, որ Արփա—Սևան թունելի անվերջ վերանորոգման աշխատանքների պատճառով լիճ է թափվում ջրի հայտարարված ծավալից քիչ՝ 110-120 մլն խորանարդ մետր 240-250 մլն խորանարդ մետրի փոխարեն. «Չնայած սրան,
օրենքով նախպատեսված 170 մլն խորանարդ մետրը չի վերանայվում։ Ներկա պայմաններում ջրառը չպետք է գերազանցի 80-90 մլն խորանարդ մետրը»,- ասաց մասնագետը։
Ինչ վերաբերվում է այս տարի լճում
մեծ քանակի ջրիմուռներին Սեյրան Մինասյանը ասաց. «Մշտական տատանումների արդյունքում
վատթարացել է ջրի որակն ու սկսել են ճահճացման գործընթացներ, որի մասին է վկայում ջրիմուռների անոմալ ծավալներով ավելացումը»։
