Էրեբունի հիվանդանոցում վիրահատությունից հետո հիվանդը արյան վարակ է ստացել ու մահացել.բազմաթիվ բարձրորակ մասնագետներ են հեռանում
Էրեբունի հիվանդանոցում նախօրեին մահվան դեպք է գրանցվել լեղապարկի հեռացման հետվիրահատական բարդության հետևանքով: 60-ամյա Անդրանիկ Անտոնյանի հարազատները պնդում են, որ նա բժիշկներիանփութության և անտարբերության զոհն է դարձել: Սեպտեմբերի 18-ի կեսօրին Անդրանիկ Անտոնյանին հարազատները Հրազդանի հիվանդանոցից տեղափոխում են Էրեբունի բուժկենտրոն՝ սուր ցավերով: Հիվանդը հոսպիտալացվում է սրտի բաժանմունմունքում, որտեղ նրան մինչև գիշերվա ժամը 23-ը հետազոտում են, որից հետո տեղեկացնում, որ հիվանդը սրտի հետ կապված խնդիրներ չունի՝ նրա ցավերի պատճառն ամենայն հավանականությամբ լեղապարկի բորբոքումն է: Կնոջ՝ Կարինե Հովասափյանի պատմելով՝ մոտավորոպես կեսգիշերի մոտ ամուսնուն տեղափոխում են 8-րդ հարկ և ասում, որ նրա լեղապարկում քար կա, ունի նաև բորբոքում, ուստի անհրաժեշտ է վիրահատություն անել: Հարազատները, սակայն, առաջարկում են, բժիշկն էլ համաձայնվում է վիրահատությունը հետաձգել առավոտյան, իսկ գիշերը ցավազրկել հիվանդին, որ ցավեր չունենա. «Գիշերը մոտավորապես ժամը 1:30-ի կողմերը, երբ արդեն մնացած բոլոր հարազատները գնացել էին, և մնացել էի միայն ես, հիվանդասենյակ մտավ բժիշկը՝ Հրաչյա Ալեքսանյանը, մեկ այլ բժշկի հետ և ասաց, որ ամուսնուս անհապաղ պետք է վիրահատեն, մինչև առավոտ սպասել չի կարելի: Ամուսինս այդ ընթացքում սուր ցավեր ուներ: Ես ասացի, որ չէի ուզենա, որ այսպես գիշերով վիրահատեն, առավել ևս, որ բժիշկը մեզ ծանոթ չէր, նրա մասնագիտական որակների մասին ինձ ոչինչ հայտնի չէր: Քիչ անց բժիշկն ինձ հրավիրեց իր սենյակ և ասաց, որ կա՛մ պետք է անհապաղ վիրահատություն անել կա՛մ էլ, եթե հրաժարվում եմ վիրահատությունից, ուրեմն պետք է փաստաթուղթ ստորագրեմ, որ բժիշկները ամուսնուս կյանքի համար պատասխանատվություն չեն կրում: Ես չգիտեի ինչ անել, խառնվեցի իրար, նորից պնդեցի, որ չեմ ուզում գիշերով վիրահատեն, բացի այդ՝ մենք ունենք ծանոթ վիրաբույժ այլ հիվանդանոցում, որը մեզ համար ավելի նախընտրելի է: Բժիշկն ինձ ասաց. «Ի՞նչ տարբերություն՝ գիշե՞ր, թե՞ ցերեկ, համ էլ իմացեք, որ մենք հիվանդի խնդիր չունենք, հենց հիմա 4-5 վիրահատություն ունենք անելու, այնպես չի որ զոռով ուզում ենք վիրահատել»: Զանգեցի հարազատներիս, ու մինչև նրանք կգային, ամուսնուս տարան: Տարբերակ չկար՝ ես ասացի՝ ոնց ճիշտ ա, էդպես արեք»,- լացելով պատմում է տիկին Կարինեն: Լեղապարկի վիրահատությունը ավարտվում է գիշերը ժամը 4-ի կողմերը: Հիվանդին բերում են սենյակ, սակայն նա, կնոջ պնդմամբ, ցավեր ուներ և անընդհատ ասում էր, որ իրեն ավելի վատ է զգում, քան մինչև վիրահատությունը: «Երբ վիրահատությունից հետո ամուսնուս բերեցին սենյակ, բժշկին հարցրեցի՝ ո՞նց անցավ վիրահատությունը: Պատասխանեց՝ ոչի՜նչ էլի, և ասաց, որ առավոտյան գնանք հաշվապահություն և 350 հազար դրամ վճարում կատարենք»:Սեպտեմբերի 19-ին՝ մինչև լույս, և ցերեկը՝ ողջ օրվա ընթացքում, հիվանդի ինքնազգացողությունը շատ վատ է եղել: Նա անընդհատ գալարվել է ցավերից, չի կարողացել միզել, փորը սկսել է ուռչել և քարանալ, վերքի մեջ դրված դրենաժի կողքը սկսել է կապտել. «Երևի մի 100 անգամ լացելով գնացել, էդ բժշկին ասել եմ, որ ամուսինս շատ վատ է, որ փորը քարանում է, որ վիրահատությունը չի օգնել նրան, բայց ոչ մի բան չէին անում: Ցավազրկում էին, մոմիկ էին դնում, որ աղիները գործեն»,- պատմում են կինը և մյուս հարազատները: Նրանց խոսքով՝ վիրահատող բժիշկը՝ Հրաչյա Ալեքսանյանը, բաժնի վարիչի հետ մի երկու անգամ եկել նայել է և ասել՝ ոչինչ, կանցնի, լավ կլինի: Բայց ցավերը գնալով ավելի են սաստկացել, դրենաժի կողքը այտուցվել ու կապտել է: Հիվանդի հարազատները ինչ-որ ծանոթ մարդ են գտել, որ վիրահատության հետևանքով առաջացած բարդությունների մասին տեղեկացրել է հիվանդանոցի գործադիր տնօրեն Միքայել Մանուկյանին / նա հիվանդանոցի սեփականտեր Հարություն Քուշկյանի փեսան է/:
Արդեն հաջորդ օրը՝ սեպտեմբերի 20-ին, առավոտյան Մանուկյանն անձամբ գալիս է հիվանդասենյակ, հրավիրում է նաև այլ բժիշկների և Անդրանիկ Անտոնյանին շտապ երկրորդ վիրահատության են ենթարկում՝ փաստորեն լեղապարկի հեռացման վիրահատությունից մոտ 32 ժամ անց: Երկրորդ վիրահատությունից հետո բժիշկները հարազատներին ասում են, որ լեղապարկի հեռացումից հետո հիվանդի մոտ՝ տասներկումատնյա աղիում առաջացել է ստրես խոց, որը պայթել է ու լցվել մաշկի տակ, այդ պատճառով նրա մոտ զարգացել է սեպսիս՝ արյան վարակ:
Երկրորդ վիրահատությունից հետո՝ մոտ 10 օր Անդրանիկ Անտոնյանը շատ ծանր վիճակում գտնվում էր Էրեբունի ԲԿ-ի վերակենդանացման բաժանմունքում: Նրա կյանքի և մահվան կռիվը ի վերջո հոկտեմբերի 1-ին՝ գիշերը ժամը 22: 40-ի կողմերը, ավարտվեց մահով: Այս 10 օրերի ընթացքում Անդրանիկ Անտոնյանի հարազատները ամեն օր մի քանի անգամ հանդիպել են բժիշկների հետ, քննարկել հիվանդի վիճակը: Նրանք փաստում են, որ բժիշկները երկրորդ վիրահատությունից հետո արել են ամեն ինչ՝ հիվանդի կյանքը փրկելու համար, դիալիզի ապարատ են միացրել, անհրաժեշտ դեղորայք տվել, և այդ ամենի համար հարազատներից գումար չեն վերցրել: Բայց հարազատները նաև համոզված են՝ արյան վարակի պատճառը լեղապարկի անհաջող վիրահատությունն է եղել և, որ ավելի վատ է, անտարբերությունը կամ անփութությունը: Փաստորեն, ավելի քան 32 ժամ հիվանդի ինքնազգացողությունը ծայրահեղ վատ է եղել, նրա մոտ սեպսիս է զարգացել, իսկ բժիշկները դա չեն նկատել և քայլեր չեն ձեռնարկել: Հարազատները հակված են դատի տալ բժշկին ու հիվանդանոցին:
Հոկտեմբերի 1-ին՝ Անդրանիկ Անտոնյանի մահվան օրը, լեղապարկի վիկրահատություն իրականացրած բժիշկը՝ Հ. Ալեքսանյանը հեռացվել է աշխատանքից: Այդ մասին մահացած հիվանդի հարազատներին ասել է Էրեբունի ԲԿ-ի տնօրեն Մ. Մանուկյանը: Երբ մահացածի հարազատները Մ. Մանուկյանին ասել են, որ պատրաստվում են դատի տալ ՝վերջինս նշել է, թե նման դեպքեր էլի են եղել և իրենք դրան պատրաստ են: Թերևս այս հիվանդանոցում վերջին տարիներին հմտացել են փաստաբաններ վարձելու գործում: Փոխարենը, մեր տեղեկություններով բազմաթիվ բարձրորակ մասնագետներ Էրեբունի ԲԿ-ից հեռանում են :
