ԱՄՆ-ում ձերբակալել են հայազգի «զենքի բարոնին»՝ապօրինի վաճառք իրականացնելու,փողերի լվացման համար
ԱՄՆ Կալիֆոռնիա նահանգի Ֆրեզնո քաղաքում ձերբակալվել է ԱՄՆ քաղաքացի, զենքի վաճառքով զբաղվող Dolarian Capital Inc (DCI) ընկերության 58-ամյա ղեկավար Արա Դոլարյանը, այս մասին տեղեկանում ենք ԱՄՆ արդարադատության նախարարության Կալիֆոռնիայի վարչության կայքից:Դոլարյանը կասկածվում է զենքի ապօրինի վաճառքի, փողերի լվացման և դավադրության համար: Ոստիկանությունը մասնավորապես կասկածներ ունի, որ Դոլարյանը փորձել է Նիգերիայի կառավարությանն Արևելյան Եվրոպայից և Հարավային Աֆրիկայից ներկրված պայթուցիկ նյութեր, հրթիռներ, հրազեն և հրանոթներ վաճառել:
Նշվում է, որ ԱՄՆ պետքարտուղարությունը հրաժարվել է Dolarian Capital Inc ընկերությանը միջազգային առևտուր իրականացնելու արտոնագիր տրամադրել:
2014թ.-ի հունիսին ԱՄՆ քաղաքացի Դոլարյանը, որն բնակվում է Բուլղարիայի մայրաքաղաք Սոֆիայում, նիգերական Societe D’Equipments Internationaux ընկերության հետ զենքի վաճառքի վերաբերյալ 8,4 մլն դոլարի համաձայնագիր է կնքել:
Եթե Դոլարյանը մեղավոր ճանաչվի բոլոր մեղադրանքներով, նրան ընդհանուր առմամբ 45 տարվա ազատազրկում կսպառնա (20 տարվա ազատազրկում և 1 մլն դոլար տուգանք` առանց արտոնագրի զենքի վաճառքի, 20 տարվա ազատազրկում և 500 հազար դոլար տուգանք՝ փողերի լվացման, 5 տարվա ազատազրկում ու 250 հազար դոլար տուգանք` դավադրության համար):
