Փորձագետը չի բացառել Թուրքիայի իշխանությունների ճնշումը հայ համայնքի վրա` Արամ Ա կաթողիկոսի դատական հայցի հետ կապված
Մեծի Տանն Կիլիկիո կաթողիկոս Արամ Առաջինի պահանջը շատ կարեւոր նշանակություն ունի, քանի որ եթե դատական գործընթացները տրամաբանական ավարտի հանգեցնեն, սա կարող է խթան հանդիսանալ մեզ համար ոչ միայն պահանջների մասին խոսելու, այլեւ դրանք իրականություն դարձնելու համար: Այս մասին NEWS.am-ին տված հարցազրույցում հայտարարեց Հայաստանի Գիտությունների ազգային ակադեմիայի Արեւելագիտության ինստիտուտի տնօրեն, թուրքագետ Ռուբեն Սաֆրաստյանը:«Ինչ վերաբերում է եկեղեցու եւ Թուրքիայի հայ համայնքի վրա ճնշման հնարավոր մեծացմանը, ապա այդ երկրում ընթացող գործընթացների օրինաչափությունը վկայում է, որ իշխանությունները բաց չեն թողնում որոշ իրադարձությունների մեղքը հայ համայնքի վրա դնելու հնարավորությունը: Ուստի դա չի կարելի բացառել նաեւ այս դեպքում` հաշվի առնելով նաեւ Թուրքիայի նախագահ Ռեջեփ Էրդողանի առանձնահատկությունները եւ կառավարման մեթոդները վերջին շրջանում: Անցած 2 տարվա ընթացքում ընդդիմության եւ ազգային փոքրամասնությունների վրա ճնշումներն առավել սուր են արտահայտվում: Մենք տեսանք, թե ինչ ճնշումներ գործադրեցին երկրի իշխանությունները Կոստանդնապոլսի պատրիարքի ընտրություններում` իրենց հարմար թեկնածուի առաջ տանելու համար», - ասաց նա:
Պատասխանելով հարցին` կարո՞ղ է արդյոք այս պահանջը հետագայում քաղաքական նպատակներով օգտագործել ընդդիմադիր ուժերը կամ միջազգային խաղացողները, թուրքագետը շեշտեց, որ կարեւորը ոչ թե դա է, այլ քայլերի հաջորդականությունը մեր պահանջների իրագործման ճանապարհին եւ վերջնական արդյունքը:
Հիշեցնենք, որ Մեծի տանն Կիլիկիո կաթողիկոս Արամ Ա-ն դատական հայց է ներկայացրել, որի շրջանակներում Անթիլիասը թուրքական իշխանություններից պահանջում է վերադարձնել պատմական Կիլիկիայի տարածքում գտնվող Սիսի կաթողիկոսարանը:
Առաջին ատյանի դատարանի դատական նիստը, որը նախատեսված էր ապրիլի 21-ին, հետաձգվեց կորոնավիրուսի տարածման պատճառով:
