ԱՄՆ-ն նախատեսում է առաջիկա երեք շաբաթներին իրականացնել ռուսական համակարգերի վրա մի շարք կիբեռհարձակումներ
ԱՄՆ-ն նախատեսում է առաջիկա երեք շաբաթներին իրականացնել ռուսական համակարգերի վրա մի շարք կիբեռհարձակումներ: Այս մասին հայտնում է The New York Times-ը՝ վկայակոչելով ամերիկյան վարչակազմում աղբյուրներին:Պարբերականի տեղեկություններով՝ ամերիկյան հատուկ ծառայությունների թիրախը կդառնան ռուսական իշխանությունների ներքին համակարգերը: Դրա պատճառն է կիբեռհարձակումը, որը 2020 թվականի մարտին հաքերներն իրականացրել էին SolarWinds ընկերության ծրագրային ապահովման միջոցով (ի դեպ, դա նկատել էին միայն 9 ամիս անց): Այդ ժամանակ վիրուսը հայտնվել էր ընկերության հազար հաճախորդների համակարգիչների մեջ, որոնց թվում էին եղել ԱՄՆ կառավարական հաստատություններ եւ 400-ից ավելի ամերիկյան խոշորագույն ձեռնարկություններ: Վաշինգտոնում ենթադրել էին, որ այդ գործողությունների նպատակն էր հետախուզական տվյալներ ստանալը, սակայն հետո ԱՄՆ իշխանությունները հավաստիացրել էին, որ հաքերները զգայուն տվյալներին չեն հասել, փոխանցում է RG-ն:
Մոսկվան բազմիցս հերքել է իր մասնակցությունը այդ իրադարձություններին՝ ուշադրություն հրավիրելով մեղադրանքների մերկապարանոց լինելու վրա:
The New York Times-ի տեղեկություններով՝ ԱՄՆ իշխանությունները նաեւ մտադիր են նոր հակառուսական պատժամիջոցներ սահմանել: Իսկ ԱՄՆ նախագահ Ջո Բայդենն առաջիկայում հրաման կստորագրի կառավարական համակագչյաին համակարգերի պաշտպանության ուժեղացման համար, որ ապագայում կանխվեն հաքերների հարձակումները:
