Առաջիկայում ականտես կլինեք ավելի լայնածավալ բողոքի ակցիաների՝ կոնկրետ գործողություններով
Ինչ նպատակ առաջին փուլում մեր առջև դրել ենք, 100 տոկոսով, մի բան էլ՝ ավել, կատարել ենք․ պայքարը շարունակվում է։ Այս մասին քիչ առաջ Ազատության հրապարակում լրագրողների հետ զրույցում հայտարարեց «Պատիվ ունեմ» խմբակցության ղեկավար Արթուր Վանեցյանը։«Գալիս են բազմաթիվ մարդիկ, ովքեր երբևէ որևէ միտինգի չեն մասնակցել, գալիս են՝ հասկանալով, որ սա պայքար է հանուն հայրենիքի, հանուն Արցախի, հանուն Հայաստանի։ Ինչ վերաբերում է մնացած ուժերի կողմից պայքարը սկսելուն, հավատացեք՝ ամբողջ ճանապարհային քարտեզը կա, մեր ընդդիմադիր գործընկերների հետ մշտապես քննարկումների մեջ ենք։ Առաջիկայում ականտես կլինեք ավելի լայնածավալ բողոքի ակցիաների՝ կոնկրետ գործողություններով»,-ասաց Վանեցյանը։
Մեկնարկած շարժմանը վնասելու, նախաձեռնողներին՝ մասնավորապես իրեն վարկաբեկելու փորձեր, ինչպես նշեց Վանեցյանը, սոցիալական ցանցերում իշխանության ֆեյք բանակների ու իշխանական լրատվամիջոցների միջոցով է ընթանում, այն էլ՝ բավականին ակտիվ։
«Եթե իմ նկատմամբ հնարավոր լիներ օրինական ճանապարհով քրեական գործ հարուցել, կալանքի տակ առնել, դատապարտել, հավատացե՛ք, որ վաղուց արած կլինեին։ Իմ հրաժարականից հետո 5-ից ավել գործով մեղադրյալ եմ եղել՝ ամենածանր հոդվածներից սկսած, որոնք ամբողջությամբ հերքվել են։ Ես չեմ արել որևէ բան, որն օրենքից դուրս է, որի համար ինձ կարող են պատասխանատվության ենթարկել»,-շեշտեց Վանեցյանը։
