ՀՀ վարչապետը խորհրդարանում շատ է խոսել ու քննարկում արել այդ մասին, մենք ոչ մեկին ոչինչ չենք պարտադրում
Հայաստանից Հավաքական անվտանգության պայմանագրի կազմակերպությունից (ՀԱՊԿ) դուրս գալու վերաբերյալ փաստաթղթեր չկան։ Այս մասին այսօր լրագրողների հետ հանդիպման ժամանակ հայտարարել է ՌԴ ԱԳ նախարար Սերգեյ Լավրովը՝ մեկնաբանելով ՀՀ վարչապետ Նիկոլ Փաշինյանի երեկվա հայտարարությունը, թե Հայաստանի և ՀԱՊԿ-ի հարաբերություններն անցել են անդառնալիության կետը։«Նման փաստաթուղթ չի ստացվել։ Մենք լսում ենք այդ խոսակցությունները, ՀՀ վարչապետը խորհրդարանում շատ է խոսել ու քննարկում արել այդ մասին։ Մենք ոչ մեկին ոչինչ չենք պարտադրում։ Համոզված ենք, որ Հայաստանի անվտանգության շահերից է բխում ՀԱՊԿ անդամակցությունն օգտագործել առավելագույնս»,-ասել է Լավրովը։
«Եթե որոշումը, որի մասին նա խոսում է որպես կանխորոշված բան, կայացվի, ապա դա կլինի Հայաստանի ներկայիս ղեկավարության ինքնիշխան իրավունքը։ Ռուսաստանը և ՀԱՊԿ մյուս անդամները չեն ձեռնարկել և չեն պատրաստվում ձեռնարկել որևէ գործողություն, որը կընկալվի որպես Երևանի համար դռների փակում»,- հավելել է Լավրովը։
