ԲՈՒՀ-երի խորհուրդներում ուսանողների ներկայությունը պետք է ավելացնել` ի հաշիվ գործարարներին տրվող 30 տոկոսի. Տեսանյութ
Հայացք մամուլի ակումբում ԱԺ պատգամավոր Ռուզաննա Մուրադյանը խոսեց «Բարձրագույն կրթության մասին» ՀՀ օրենքի նախագծի շուրջ:«Երկրի զարգացման հենքը կրթությունն
է ու գիտությունը: Ուստի, անկախ կուսակցական պատկանելիությունից, բոլորս պետք է շահագրգիռ
լինենք այս փոփոխություններով: Արդեն ժամանակն է, որպեսզի վերանայենք բարձրագույն կրթության
կառավարման համակարգը։ Պետք է պատրաստ լինենք այն բոլոր փոփոխություններին, որոնք սպասվում
են։ Հնարավոր է՝ այսօր ունենանք մասնագիտությունների շարք, որոնք մի քանի տարի հետո
մեզ պետք չլինեն։ «Բարձրագույն կրթության մասին» ՀՀ օրենքի նախագիծը բոլորիս է մտահոգում, մտահոգում է դրական առումով։ Սա մեկ նոր աստիճան է, նոր առաջընթաց և հաջողությամբ պսակելու դեպքում մենք կունենանք կրթության առաջընթացի կարևոր արդյունք, սակայն պետք է պայքարենք մինչ այդ արդյունքը գրանցելը»,- ասաց Ռուզաննա Մուրադյանը։
Ըստ
Ռուզաննա Մուրադյանի առաջընթաց քայլ է նաև կառավարման համակարգում որոշակի գործառույթներ առանձնացնելը, որոնք մինչև հիմա դրված են եղել ռեկտորների վրա. «Քննարկվում է նաև ամբիոնի վարիչների, դեկանների հարցը։ Տարիքային հարցն է քննարկվում, որը ցավոտ է ընդունվում փորձառու մասնագետների կողմից։ 30-55 տարեկան գիտությամբ զբաղվող մարդկանց թիվը 6 տոկոս է կազմում, իսկ 60-ից բարձր՝ 36 տոկոս։ Մենք այստեղ բավականին լուրջ բացթողում ունենք, չկան այն կադրերը, որոնց վաստակաշատ գիտնականները կփոխանցեն իրենց դիրքերը։ Կադրերի պատրաստման գծով լուրջ խնդիր կա և պետք է մեխանիզմներ մշակել,-ասաց նա»։
Ռուզաննա Մուրադյանը նաև ասաց, որ չպետք է ցավոտ նայենք փոփոխություններին,
բայց ցավոտ հարցերին լուծումներ պետք է տանք: «Հիմա առաջարկություններ անելու ճիշտ ժամանակն է, որպեսզի երբ օրենքը ընդունվի՝ բողոքներ չլինեն: Օրենքը չպետք է շատ ծանրաբեռնված լինի իրավական ակտերի բովանդկությամբ, որպեսզի հետագայում փոփոխությունների դեպքում ստիպված չլինեն փոխել օրենքը: Օրենքում պետք է ուժեղացվի հետազոտական ծրագրերի առկայությունը։ Ուսանողին պետք է սովորեցնենք հետազոտել: Կարևոր է նաև, որպեսզի այս օրենքը ծառայի այն վերջնարդյունքին, ինչին ցանկանում ենք այն ուղղել»։
Անդրադառնալով ԲՈՒՀ-երի խորհուրդներում քաղաքական անձանց մասնակցությանը, Ռուզաննա Մուրադյանը ասաց. «Այս օրենքը կարծես ապաքաղաքականացման հարցն էլ է լուծում, բայց ես սուբյեկտիվ վերաբերմունք ունեմ այս հարցի վերաբերյալ: Կարծում եմ, որ հաճախ քաղաքական գործիչը իր հնարավորությունների շրջանակում նպաստ է բերում տվյալ ԲՈՒՀ-ին,-ասաց նա հավելելով, որ ԲՈՒՀ-երի կառավարման խորհուրդներում ուսանողների ներկայությունը պետք է ավելացնել` ի հաշիվ գործարարներին տրվող 30 տոկոսի:
