Արմեն Բիլյանի խափանման միջոցը փոխելու միջնորդությունը մերժվեց
ՊՊԾ գնդի գրավման գործով այսօրվա դատական նիստի ժամանակ ամբաստանյալներ Պավել Մանուկյանի ու Արմեն Բիլյանի շահերի պաշտպան Զարուհի Փոստանջյանը միջնորդեց փոխել Բիլյանի խափանման միջոց կալանքը չհեռանալու մասին ստորագրությամբ: Պավել Մանուկյանն էլ իր կողմից ավելացրեց, որ «Բիլյանը հայրենիքն նվիրված մարդ է, այս ազգին պիտանի մարդ է: Նա հանցագործ անցյալ չի ունեցել, նա հայ ազգի մասին մտահոգ քաղաքացի է և կատարել է իր սրբազան պարտքը»: Սակայն թե՛ պետական մեղադրողները, թե՛ ՊՊԾ գնդի գրավման ժամանակ սպանված ոստիկան Գագիկ Մկրտչյանի այրին դեմ էին, որ Բիլյանի կալանքը փոխվի: Ոստիկանի այրին մասնավորապես ասաց.«Ազգի համար գնացող մեկը բանկոմա՞տ է թալանում: Հանուն հայրենիքի մարդը չի գնում մանր գողության: Ինձ հետաքրքիր չի` վնասվածքը եղել է իր կողմից, թե մեկ ուրիշի: Գագիկ Մկրտչյանը վիրավոր է եղել, 27 օր ապրել է, որից 12 օրը գիտակցության մեջ է եղել: Ես խոսել եմ Գագիկի հետ, նա ասել է` ինչպես է վնասվածք ստացել: Գնդակը թևից մտել է, որովայնի մյուս կողմից դուրս է եկել: Առարկում եմ միջնորդության դեմ»:
Հիշեցնենք, որ Պավել Մանուկյանը նախորդ դատական նիստերից մեկի ժամանակ հայտարարեց, թե Գագիկ Մկրտչյանին սպանողը Արմեն Բիլյանը չէ:
Նախագահող դատավոր Մեսրոպ Մակյանը մերժեց այս միջնորդությունը:
