«Մի քանի անգամ օդ են կրակել, մի անհանգստացեք»․ ի՞նչ վիճակ է հիմա Ագարակում
Սյունիքի մարզի Ագարակ գյուղում (խոշորացված Կապան համայնք) վիճակը հանգիստ է։ Այս մասին Sputnik Արմենիայի հետ զրույցում ասաց Ագարակի գյուղապետ Հայկ Սահակյանը։«Գյուղում հիմա ոչ մի բան չի կատարվում, ամեն ինչ նորմալ ա։ Թուրքերը մի քանի անգամ օդ են կրակել, հիմա տենց բան չկա», - ասաց նա։
Սահակյանի խոսքով՝ բնակիչները հանգիստ են, չեն լարվել։
«Մենք հանգիստ ենք, դուք մի անհանգստացեք», - ասաց գյուղապետը։
Նշենք, որ մի քանի ժամ առաջ Հայաստանի ՄԻՊ-ը հրապարակել էր կադրեր Սյունիքի մարզի Ագարակ գյուղից, որոնցում լսվում էին կրակոցներ։ Հիմա գյուղում վիճակը հանգիստ է։
Հիշեցնենք, որ նոյեմբերի 10-ի եռակողմ հայտարարությունից հետո սահմանային իրավիճակը փոխվել է ոչ միայն Արցախում, այլև ՀՀ որոշ մարզերում` Գեղարքունիքում, Վայոց Ձորում, Սյունիքում։
ՀՀ պաշտպանության նախարարությունը դեկտեմբերի 20–ին տեղեկացրել է, որ ռուս սահմանապահ ուժեր կտեղակայվեն Սյունիքի մարզի Գորիս-Կապան ավտոճանապարհի 21 կիլոմետրանոց հատվածում, որի մյուս կողմում տեղակայվել են ադրեջանցի զինծառայողներ։
Հունվարի 5-ին Սյունիքի մարզի Շուռնուխ գյուղի 12 տները հանձնվեցին ադրբեջանցիներին։ Փետրվարի 5-ին մարզի Ներքին Խնձորեսկ գյուղից հայկական զինծառայողները նահանջել են՝ թշնամուն թողնելով 15 հեկտար հողատարածք։
.jpg)
