«Ֆրանսիան չի լքի հայերին,մեր արժեքները և մեր սկզբունքները չեն կարող վաճառվել ո՛չ գազի, ո՛չ նավթի համար»
eadaily.com–ը գրում է, որ Ֆրանսիայի նախագահ Էմանուել Մակրոնը Ռուսաստանին մեղադրել է կովկասյան տարածաշրջանում հայ-ադրբեջանական սահմանին «իրավիճակը բորբոքելու» և դրանից դուրս «իրավիճակը ապակայունացնելու» մեջ։ Միաժամանակ, Ֆրանսիայի ղեկավարը պնդել է, որ Մոսկվան «խաղացել է հօգուտ Բաքվի»։ Ելիսեյան պալատի տերն իր ոչ միանշանակ հայտարարություններն արել է France 2 հեռուստաալիքի L'Événement ծրագրում։Հաղորդման վարող Քերոլայն Ռուն ընթերցել է մի հատված հայտնի ճանապարհորդ և գրող Սիլվեն Տեսոնից, ով վերջերս է վերադարձել Հայաստանից, և որը կոչով դիմել է Ֆրանսիայի նախագահին: Կոչը կհրապարակվի հաջորդ շաբաթավերջին Le Figaro թերթում։
Թեսոնը, մասնավորապես, նշել է. «Հայաստանը մեզ համար պարզապես տարածք չէ, ինչպես մյուսները։ Նրա ճակատագիրը, պատմությունը, հիշողությունը, մշակույթը, ցավը, հողը ... այն եվրոպական ֆորպոստ է: Պարոն նախագահ, հայերը դիմում են ձեզ. արդյո՞ք Ֆրանսիան ռիսկի կդիմի իր դաշնակիցներին համախմբելու հանուն Հայաստանի պաշտպանության»։
Միաժամանակ հաղորդավարը նախատել է Մակրոնին, որ Ֆրանսիան «Հայաստանը թողել է իր բախտին»։ Հինգերորդ հանրապետության ղեկավարը համաձայնել է, որ իսկապես կա եզակի կապ Ֆրանսիայի և Հայաստանի միջև, սակայն կտրականապես մերժել է Անդրկովկասյան այդ հանրապետության ճակատագրի նկատմամբ անտարբերության մեղադրանքները։ Այդ կապակցությամբ Մակրոնը կարճ պատմական շեղում է կատարել հիշեցնելով, որ Ֆրանսիան միշտ հետևողական է եղել Օսմանյան կայսրությունում Հայոց ցեղասպանության ժխտման դեմ պայքարում։ Նա նաև հիշեցրել է, որ բազմաթիվ հայեր մեծ ներդրում են ունեցել հենց Ֆրանսիայի զարգացման գործում։
«Նախ ասեմ, որ Տեսոնը, անշուշտ, իրավացի է։ Հայաստանը մի երկիր է, որի հետ մենք առանձնահատուկ կապ ունենք։ Որովհետև Հայաստանը միշտ պայքարել է այդ տարածաշրջանում հանդուրժողականության և խաղաղության համար»,- ասել է նախագահը։
Խոսելով իր առաքելության մասին Մակրոնը հիշեցրել է, որ հայ-ադրբեջանական սահմանին վերջին էսկալացիայի սկսվելուց անմիջապես հետո Ֆրանսիան արտաքին գործերի նախարարության և բարձրագույն քաղաքական ղեկավարության միջոցով կապ է հաստատել հակամարտող կողմերի հետ, և վարչապետ Նիկոլ Փաշինյանը գրեթե անմիջապես հանդիպել է. իրեն՝ Մակրոնի, հետ Ելիսեյան պալատում: Նաև Փարիզի և ԵՄ խորհրդի նախագահ Շառլ Միշելի միջնորդությամբ Պրահայում Եվրոպական քաղաքական համայնքի հանդիպման շրջանակում կայացել է Հայաստանի և Ադրբեջանի ղեկավարների հանդիպումը, հիշեցրել է Ֆրանսիայի ղեկավարը։ Այդս իրադարձության կարևորությունը չի կարելի թերագնահատել, քանի որ «այն թույլ է տվել Հայաստանի վարչապետին նորագույն պատմության մեջ առաջին անգամ հանդիպել Թուրքիայի նախագահի հետ»։
Մակրոնը նաև նշել է 2020 թվականի աշնան 44-օրյա պատերազմը։ Ադրբեջանն է, ըստ նրա, սկսել այդ սարսափելի պատերազմը, որը հանգեցրել է բազմաթիվ զոհերի ու վայրագությունների։, բացի դա այս տարվա սեպտեմբերին Ադրբեջանը մի քանի հարձակողական գործողություններ է ձեռնարկել Հայաստանի հետ սահմանի երկայնքով՝ միջանցք (դեպի Նախիջևան) բացելու նպատակով, շարունակել է Ֆրանսիայի նախագահը։ «Մենք դա միանշանակ դատապարտել ենք։ Մենք հավաքվեցինք ԵՄ Խորհրդի նախագահի, Հայաստանի վարչապետի և Ադրբեջանի նախագահի հետ և որոշեցինք, որ առաջին հերթին կողմերը պետք է պարտավորվեն ճանաչել 1991 թվականի սահմանները... Իսկ ինչ է տեղի ունենում։ Այս սահմանին արդեն երկու տարի է 5000 ռուս զինվոր կա։ Ռուսաստանը օգտվել է այդ հակամարտությունից, միջամտել և հստակ խաղացել է Ադրբեջանի խաղը Թուրքիայի մեղսակցության հետ միասին։ Վերջինս վերադարձել է այնտեղ, որպեսզի թուլացնի Հայաստանը։ Եվ այն, ինչ տեղի է ունենում ապակայունացնող մանևր է Ռուսաստանի կողմից, որը փորձում է անկարգություններ ստեղծել Կովկասում մեզ բոլորիս թուլացնելու և պառակտելու համար»,–ասել է Ֆրանսիայի նախագահը։
Հարցին, թե արդյո՞ք ԵՄ-ն Ադրբեջանի նկատմամբ հատուկ հանդուրժողականություն է ցուցաբերում գազի մատակարարման վերաբերյալ վերջին համաձայնագրի պատճառով, Մակրոնը նշել է, որ Ֆրանսիան Բաքվից կապույտ վառելիք չի գնում։ «Եվ մենք չենք լքի հայերին: Ֆրանսիան ադրբեջանական գազ չի գնում, պայմանավորվածություն չկա: Իհարկե, եվրոպական մի քանի երկրներ գազային պայմանագրեր ունեն։ Ինչ վերաբերում է Ֆրանսիային և Եվրոպային, ուղիղ նայելով ձեր աչքերի մեջ և մեր բոլոր հայրենակիցների առջև, պետք է ասեմ, որ մեր արժեքները և մեր սկզբունքները չեն կարող վաճառվել ո՛չ գազի, ո՛չ նավթի համար», - ասել է Մակրոնը։
