Արդեն Հայաստանը Ռուսաստանից ոչինչ չի ուզում, հիմա ուզում է Արևմուտքից
Vestikavkaza.ru-ն գրում է, որ ռուս-հայկական հարաբերություններում լարված շրջան է շարունակվում: ՀՀ Անվտանգության խորհրդի քարտուղար Արմեն Գրիգորյանը, առանց բացատրության, հրաժարվել է գնալ Մոսկվա ԱՊՀ երկրների իր գործընկերների գագաթնաժողովին։ Հայաստանի ԱԳՆ-ն մի կողմից խոսում է բոլոր տարաձայնությունները բարեկամական մթնոլորտում լուծելու ցանկության մասին, իսկ մյուս կողմից հայկական լրատվամիջոցներում շարունակում է խրախուսել հակառուսական հիստերիան։ Vestikavkaza.ru-ն զրուցել է Ժամանակակից պետական զարգացման ինստիտուտի տնօրեն Դմիտրի Սոլոննիկովի հետ այն մասին, թե ինչ է կատարվում Մոսկվայի և Երևանի միջև և ինչի կարող է դա հանգեցնել։-Դմիտրի Վլադիմիրովիչ, Ձեր գնահատմամբ, ինչպիսի՞ն են ներկայումս Ռուսաստանի և Հայաստանի հարաբերությունները։
-Հիմա հարաբերությունների դինամիկան շատ դանդաղ է, կարելի է ասել հանգիստ, այսինքն չկան իրավիճակի ոչ բարելավման, ոչ էլ սրման միտումներ։ Հայաստանն արդեն ցույց է տվել իր դիրքորոշումը, որը բազմիցս հայտարարել և հաստատել է տարբեր գործողություններով, այդ թվում մասնակցելով հակառուսական գագաթնաժողովներին։ Եթե խոսենք վերջին իրադարձությունների մասին, ապա որոշակի բացասական կայունություն է տիրում, ոչ մի ուղղությամբ էական ոչինչ տեղի չի ունենում, բայց հարաբերություններն աստիճանաբար վատանում են։ Հայաստանն ավելի ու ավելի է ցույց տալիս իր ուղղվածությունը Ռուսաստանի հետ հարաբերություններում լարվածության սրման։ Փոփոխություն դեպի լավը ընդհանրապես չկա։
-Ձեր կարծիքով, ի՞նչ է ուզում Հայաստանը Ռուսաստանից հիմա՝ Ղարաբաղի հարցի լուծումից հետո։
- Արդեն կարելի է ասել, որ Հայաստանը Ռուսաստանից ոչինչ չի ուզում, հիմա ուզում է Արևմուտքից։ Հայաստանն աշխատում է ռուսամետ արտաքին քաղաքականությունը վերաուղղել դեպի ԱՄՆ և Բրյուսել։ Ստեղծված իրավիճակում Փաշինյանի խնդիրն է Հայաստանին ներքաշել արևմտյան քաղաքական դիսկուրսի մեջ, հայտնվել ԱՄՆ-ի և Եվրոպայի հովանու ներքո և բարձրացնել ԵՄ-ին և ՆԱՏՕ-ին անդամակցության հարցը։ Նա հիմա լուծում է այդ խնդիրը։
-Ինչպե՞ս է Մոսկվան հակադրվում հակառուսական այս քաղաքականությանը։
-Հիմա մենք տեսնում ենք, որ Մոսկվան զբաղված է գործող միջազգային պայմանագրերին իր հավատարմությունը դրսևորելով, այդ թվում ԵԱՏՄ-ի և ՀԱՊԿ-ի շրջանակներում։ Մեր իշխանություններն աշխատում են Հայաստանի հետ շփումներում այդ ինտեգրացիոն գործընթացներն ակտիվացնելու ուղղությամբ։ Առայժմ այդքանը:
- Հիմա ո՞ր ուժերը կխանգարեն ռուս-հայկական երկխոսությանը։
-Փաշինյանն ու իր թիմը կատարում են իրենց վրա դրված խնդիրը` սկսած 2018 թվականից, երբ իշխանություն ստացան արտաքին ուժերի օգնությամբ, այդ իրադարձությունները կարող եք անվանել հեղաշրջում, տապալում կամ արհեստականորեն կազմակերպված զանգվածային բողոքի ակցիաներ։ Այսինքն, այն ժամանակից էին Փաշինյանին պարտավորեցրել վերաձևել Հայաստանի արտաքին քաղաքական դիսկուրսը։ Այսօր նա դա լուծում է ի շահ այն ուժերի, որոնք դեմ են ռուս և հայ ժողովուրդների պատմականորեն հաստատված հարաբերություններին։ Բայց ինչպես ասել է ՌԴ ԱԳ նախարար Սերգեյ Լավրովը, Հայաստանում ոչ մի ժամանակավոր վարչակազմ չի կարող փոխել ռուս և հայ ժողովուրդների պատմական բարեկամական հարաբերությունները, և պետք է ելնել դրանից:
