Կառավարությունն օրենքի փոփոխություն է ներկայացրել
Արդարադատության նախարար Դավիթ Հարությունյանն առաջարկում է փոխել Քրեական դատավարության օրենսգրքի 135-րդ հոդվածի 2-րդ մասի 2-րդ պարբերությունը:ԱԺ պետաիրավական հարցերով մշտական հանձնաժողովում հարցի քննարկման ժամանակ Հարությունյանը նշեց, որ փոփոխության համաձայն՝ կալանավորումը մեղադրյալի նկատմամբ կարող է կիրառվել նաև այն դեպքում, երբ մեղադրյալի կողմից էականորեն կամ պարբերաբար խախտվել են իր նկատմամբ կիրառված խափանման միջոցի պայմանները, և կան բավարար հիմքեր՝ ենթադրելու, որ այդ խափանման միջոցի կիրառումը կամ խափանման այլ միջոց կիրառելն այլևս բավարար չեն նրա կողմից սույն հոդվածի առաջին մասով նախատեսված որևէ գործողության կատարումը կանխելու համար:
Նախարարը նշեց, որ հաշվի են առնվել ԵԱՀԿ-ի կողմից մշակված նախապայմանները, որոնք հիմք պետք է հանդիսանան կալանքը կիրառելու համար:
«Մենք չենք կապում այս կարգավորումը ազատազրկման ժամկետի հետ: Եթե կան դեպքեր, որ անգամ ազատազրկումը Քրեական օրենսգրքով մեկ տարուց պակաս է նախատեսված, և մարդու նկատմամբ կիրառվել է որևէ այլ խափանման միջոց, օրինակ` ստորագրություն չհեռանալու մասին, և անձը խախտում է այդ խափանման միջոցը, ապա պետք է համոզմունք առաջանա, որ այն այլևս արդյունավետ չէ, ու կան հիմքեր՝ ենթադրելու, որ անձը կկատարի առաջին մասով նախատեսված որևէ գործողություն»,- նշեց Դ. Հարությունյանը:
Արդարադատության նախարարը նշեց, որ նախկինում անկախ նրանից՝ կա՞ր առաջին մասով գործողությունների կատարման վտանգ, թե ոչ, կալանքը կարող էր լինել:
«Ելք» խմբակցության պատգամավոր Արտակ Զեյլյանյանը հարցրեց՝ խափանման միջոցը չի դիտարկվի՞ որպես քողարկված պատիժ, եթե անձը խափանման միջոցի սահմանափակումը չկատարի ու նրան ազատազրկեն: Դավիթ Հարությունյանը բացասական պատասխան տվեց: «Մենք մտցրել ենք ավելի մեծ սահմանափակում, քան կա կոնվենցիայում: Ասում ենք, որ մեկ տարուց ավել պետք է լինի, որ կալանքը կիրառվի: Խափանման միջոցը պետք է էական կամ պարբերաբար խախտված լինի, որ սահմանվի»,- նշեց նա:
Զեյնալյանը նաև հարցրեց՝ գործերի քանակը չի՞ աճի: Դավիթ Հարությունյանը պատասխանեց, որ դա որևէ մեկը նախապես հաշվել չի կարող: «Վճռաբեկ դատարանի դերակատարումը փոխվում է: Ժամանակի ընթացքում ցույց կերևա՝ աճո՞ւմ է ծանրաբեռնվածությունը, թե ոչ: Մի բան ակնհայտ է՝ Դատական օրենսգիրքը նախատեսում է գործերի քննության ողջամիտ ժամկետ»,- ասաց արդարադատության նախարարը:
