Ահա, թե ինչու է քանի օր Ադրբեջանի ՊՆ–ն հայտարարում ,թե իբր հայերն են կրակում. լեգիտիմ հիմք է նախապատրաստում ՀL-ի հետ նոր պատերազմական գործողություններ սկսելու համար
Ուշադրություն պետք է դարձնել այն հանգամանքի վրա, որ Ադրբեջանի ՊՆ-ն արդեն որերորդ անգամ հայտարարությամբ է հանդես գալիս, թե իբր հայկական զինված ուժերը կրակ են բացում սահմանի մոտ տեղակայված ադրբեջանական ստորաբաժանումների վրա: Հատկապես նման հայտարարությունները կապված են Հայաստանի սահմանի հյուսիս-արևելյան մասի հետ: Ադրբեջանը արդեն սկսել է տեղեկատվական արշավ, համաձայն որի, իբր, հայկական զինված ուժերը մտադիր են շարքից հանել Ադրբեջանով անցնող գազամուղները:Այս քայլով Ադրբեջանը փորձում է ակնարկել եվրոպացիներին, թե, իբր, հայերը գործում են ռուսների հրահրմամբ: Իբր, ռուսական հնարավոր ներխուժումից հետո, երբ կկանգնեցվի «Ռուսական հոսք-2»-ի աշխատանքները Եվրոպան կարիք կունենա լրացուցիչ գազի մատակարարման համար: Ի դեպ հենց այդ հարցով օրեր առաջ Ադրբեջանի նախագահ Իլհամ Ալիևին զանգել էր ՆԱՏՕ-ի գլխավոր քարտուղար Յենս Ստոլտենբերգը: Ալիևը հավաստիացրել էր ՆԱՏՕ-ի գլխավոր քարտուղարին, որ Ադրբեջանը կմեծացնի գազի մատակարարման ծավալները եվրոպացիների համար, որպեսզի նրանք ռուս-ուկրաինական պատերազմից շատ չտուժեն:
Իդեպ, եթե այդ ներխուժումը կայանար, ապա Մոսկվայի կախվածությունը Թուրքիայից էլ ավելի կմեծանար, քանզի միակ ՆԱՏՕ-ի անդամ երկիրը, ով կարող էր դիմակայել Ռուսաստանին, եվրոպական թատերաբեմում, դա կլիներ Թուրքիան: Հենց դրա համար էլ Թուրքիայի նախագահ Ռեջեփ Թայիփ Էրդողանը փորձում էր դեր կատարել այս ռուս-արևմտյան հակամարտության մեջ, այսպես կոչված, «ջոկերի» դեր:
Ավելին, նախօրեին նույնիսկ հայտարարվեց, որ փետրվարի երկրորդ կեսին ՌԴ նախագահ Վլադիմիր Պուտինը նույնիսկ կարող է այցելել Անկարա՝ Էրդողանի հետ հանդիպելու համար:
Իսկ ռուս փորձագետները արդեն, առանց ամոթի հայտարարում են, թե, իբր, Ռուսաստանի և Թուրքիայի շահերը մի շարք տարածաշրջաններում, այդ թվում նաև Հարավային Կովկասում կամ համընկնում են, կամ էլ շատ մոտ են իրար:
Ադրբեջանցիները թուրքերի հորդորմամբ այս ամենը փորձում են կապիտալիզացնել, ինչպես միշտ հայերի հաշվին:
Ահա, թե ինչու արդեն մի քանի օր է, ինչ Ադրբեջանի ՊՆ–ն հայտարարում է, թե, իբր, հայկական ուժերը սահմանի մի շարք տեղերում կրակ են բացում ադրբեջանցիների վրա: Իսկ երեկ էլ հայտնի դարձավ, որ Ադրբեջանի դատախազությունը «մեղադրանք է» իջեցրել ԼՂՀ նախագահի հասցեին, իբր «Գյանջայի վրա հրթիռային հարձակման» համար, այն որակելով՝ որպես «ահաբեկչական գործողություն»: Ավելին, Ադրբեջանի դատախազության հայտարարության մեջ նշվում է, թե իբր այդ «…ահաբեկչական գործողությունն իրականացվել է Հայաստանի տարածքից, և որի արդյունքում սպանվել են 26 անմեղ քաղաքացի, այդ թվում նաև երեխաներ...»:
Այդ «մեղադրանքի» հիման վրա Ադրբեջանի իրավապահ մարմինները նույնիսկ հայտարարում են, որ «սեղմ ժամկետներում ձերբակալելու են Արայիկ Հարությունյանին»:
Սա նշանակում է արհեստականորեն ստեղծել Casus belli իրավիճակ, որպեսզի նոր հայ-ադրբեջանական պատերազմը դառնա անխուսափելի:
Բաքվի այս դիրքորոշման փոփոխությունը կապված է հենց ռուս-արևմտյան ճգնաժամի հետ՝ Ուկրաինայի խնդրի շուրջ: Անկարան հասկանում է, որ իր կշիռը բարձրացել է այս ճգնաժամի արդյունքում և այդ իսկ պատճառով էլ «քսի» է տալիս իր «փոքր եղբորը», որպեսզի նրա ձեռքերով կապիտալիզացնի իր այդ փոքրիկ հաջողությունը: Ղարաբաղյան վերջին պատերազմը երկու տարի է ինչ ավարտվել է, «Գյանջայի ռմբակոծումը» եղել է երկու տարի առաջ, սակայն Ադրբեջանը հենց այսօր է «հիշել» է դրա մասին, ինչը կապված է հենց այս վերջին ռուս-արևմտյան ճգնաժամի հետ:
Սակայն, բարեբախտաբար, ռուս-ուկրաինական բախումը հետաձգվում է, և այս հարցում «ջոկերի» դերը ավելի հաջող ձևով կատարում է Ֆրանսիայի նախագահ՝ Էմանուել Մակրոնը, այլ ոչ թե Էրդողանը:
Այդ իսկ պատճառով, Ադրբեջանի կողմից հնարավոր ռազմական գործողությունների վերսկսումը զրկվում է իր «լեգիտիմության» հիմքից:
Ահա, թե ինչու, որպեսզի Բաքվի պլանները վերջնական ձևով խափանվեն, պաշտոնական Երևանը պետք է ամենակոշտ ձևով արձագանքի Ադրբեջանի դատախազության որոշմանը Արայիկ Հարությունյանի վերաբերյալ: Ավելին, Երևանը պետք է պահանջի շտապ նիստ հրավիրել ԵԱՀԿ Մինսկի խմբի համանախագահների մասնակցությամբ, որպեսզի կանխվի ադրբեջանցիների մտահղացումը:
Եթե Փաշինյանը հապաղի այս քայլերի հարցում, ապա հետագա հնարավոր լարված իրավիճակի գլխավոր և միակ մեղավորը կդառնա հենց ինքը՝ Փաշինյանը:
Սա է իրականությունը:
armday.am
