Տեսանյութ.Ադրբեջանական անցակետեր կարող են հայտնվել Արցախ-Հայաստան ճանապարհին. երաշխիքներ չկան
Գլխավոր սպառնալիքը գալիս է Հայաստանյան իշխանությունից: Այն գործընթացը, որն այսօր սկսել են ՀՀ իշխանությունները՝ սկսած երկրի պետական կառավարման համակարգի կազմալուծումից և նրա առանցքային ինստիտուտների ոչնչացումից, վերջացրած՝ այն պետական քաղաքականությամբ, որն այսօր վարում է: Նման հայտարարությամբ հանդես եկավ ԱԺ պատգամավոր Տիգրան Աբրահամյանը՝ արձանագրելով, որ անխուսափելի է հիմնական մոտեցումը, որ Հայաստանի և Արցախի դեպքում ընդհանուր սպառնալիքները համակարգային են և ընդհանուր:Նրա խոսքով՝ գլխավոր գործընթացը, որն այսօր ընթանում է, այսպես կոչված՝ խաղաղության պայմանագիրն է, որովհետև առաջին հայացքից է միայն այս գործընթացը խաղաղության մասին, իրականության մեջ այն կարող էր կոչվել կապիտուլյացիա:
Աբրահամյանի գնահատմամբ՝ փաստաթուղթը միայն Արցախի հետ կապված հարցը չէ առաջ բերում, առաջ է բերում նաև սահմանազատման-սահմանագծման, Զանգեզուրի միջանցքի հարցը։ Խնդիրն այն է, որ Ադրբեջանը փորձում է իր առավելապաշտական մոտեցումներն ամբողջությամբ ամրագրել փաստաթղթում և ՀՀ-ի կողմից ներկայացվող սկզբունքները Հայաստանի և Արցախի կենսական նշանակության հարցերը որևէ ամրագրում չունեն:
Ավելին, ձևակերպումները, որոնք դրված են խաղաղության պայմանագրի հիմքում՝ Արցախում ապրող մեր հայրենակիցների իրավունքների և ազատությունների վերաբերյալ մոտեցումը, հենց այն է, ինչը տարիներ շարունակ Ադրբեջանը փորձում է ամրագրել և, Աբրահամյանի դիտարկմամբ, ստեղծվել է իրավիճակ, որ ՀՀ իշխանությունները ոչ միայն հետ են կանգնել ինքնորոշման իրավունքի իրացման սկզբունքից, այլ՝ ներկայացնբում են մոտեցումներ, որոնք տարիներ շարունակ ներկայացվել են Ադրբեջանի կողմից:
Անդրադառնալով Հայաստանն Արցախին կապող ճանապարհին՝ Տիգրան Աբրահամյանը նշեց, որ չունի վստահություն, որ այն միջանցք է, ինքը չունի հիմնավորումներ, որ բուֆերային տարածքում 5 կմ-ն ապահովվում է, բացի այդ, Ադրբեջանը շարունակում է պնդել, որ իր համար անցակետերի տեղադրումը ավարտված չէ և այս պարագայում որևէ մեկը չունի երաշխիք, որ այդ ճանապարհիւն հետագայում ադրբեջանական անցակետեր չեն հայտնվի:
