Քաոսային իրավիճակ.հնարավոր է Հայաստանի ավտոմեքենաների շուկայում գների կտրուկ անկում լինի
Ավտոմեքենաներ ներկրողների առջև ծառացած խնդիրները քննարկվել են դեռ 2 տարի առաջ: Ակնհայտ է, որ ամբողջ բիզնեսը հիմնված էր օրենքի բացերի վրա, և նման գործունեությունն իր մեջ ռիսկեր էր պարունակում: Արդյունքում, մենք բախվեցինք մի իրավիճակի, երբ 3-4 ամիս անց ավտոմեքենաների շուկայում կարող է գների կտրուկ անկում գրանցվել: Այս մասին փետրվարի 4-ին լրագրողների հետ հանդիպման ժամանակ ասաց Հայաստանի տաքսի ծառայությունների գործատուների ճյուղային միության նախագահ Վահագն Սահակյանը:Ըստ Սահակյանի` ի սկզբանե Հայաստանի` ԵՏՄ մտնելու նպատակն էր այն Միության խոշոր երկրների անդամների համար շուկա դարձնելը, այդ թվում նաև` ավտոմեքենաների: «Սրանով է բացատրվում այն, որ, օրինակ, ցանկացած ռուսական ապրանք անարգել կերպով հայտնվում է հայկական շուկայում, մինչդեռ հայ արտահանողները ժամանակ առ ժամանակ խոչընդոտների են հանդիպում: Ինչ վերաբերում է ինքնին ավտոմոբիլային ոլորտին, ապա վերջին տարիներին Ռուսաստանի ավտոարդյունաբերությունը մեծ առաջընթաց է ապրում, և իրենց ճանապարհներին հին ավտոմեքենաներից ազատվելու անհրաժեշտություն է առաջացել, այդ թվում` դրանք այլ երկրներ արտահանելով և շուկան նոր արտադրությամբ համալրելով:
Նման քայլերից մեկը դարձավ արհեստական խոչընդոտների ստեղծումը, երբ Ռուսաստանի ապահովագրական ընկերությունները ձգձգում էին հայկական համարանիշներով ավտոմեքենաների գործարքները: Հայաստանի իշխանությունները ի վիճակի չեն լուծել մաքսադրույքների հետ կապված առաջացած խնդիրը. որոշումը կայացվել էր վաղուց, երբ ստորագրվել էր ԵԱՏՄ-ին անդամակցելու մասին փաստաթուղթը, որը գործում է իր նորմերով և օրենքներով»,- նշեց նա:
Վահագն Սահակյանը հավելեց, որ պետությունը երբեմն զիջումների է գնում բողոքի ցույցերի ճնշման տակ, սակայն էապես ոչինչ փոխել հնարավոր չէ: «Ավելին, մարդիկ երբեմն տեսնում են, որ իրենց բողոքի ցույցերի միջոցով հաջողվում է առաջադրել երբեմն նույնիսկ ապօրինի պահանջներ, և դա կարող է վերածվել վտանգավոր միտման»,- նշեց փորձագետը:
Նա շեշտեց, որ այժմ սուր կերպով կանգնած է այն ավտոմեքենաների խնդիրը, որոնք արդեն ներմուծվել են, և այն ավտոմեքենաներինը` տասնյակ հազարների չափով, որոնք ճանապարհին են և դեռ ներմուծվելու են: «Մարդիկ միանգամից մի քանի ավտոմեքենա են գնել և այս պայմաններում բախվել են դրանց իրացման խնդրին: Սրան գումարվում է արտահանվող ավտոմեքենաների և չիրացված ավտոմեքենաների գույքահարկի վճարման խնդիրը»,- նշեց Սահակյանը:
