Ուզում եմ, որ մեր հայրենիքի և պետության սահմանները քայլ առ քայլ, աստիճանաբար նույնանան

Hayacq.com-ի ամանորյա բլից-հարցազրույցը ԱԺ պատգամավոր Շիրակ Թորոսյանի հետ:

-Եթե 2019թ-ն ամփոփելու լինենք, ինչպիսի՞ն էր այն Շիրակ Թորոսյանի համար:

-2019-ը մեծ ծավալի բազմակողմանի աշխատանքի, ձեռքբերումների, հույսերի և ակնկալիքների որոշակի հատվածի իրականացումների տարի էր:

-Գլխավոր ձեռքբերումները որո՞նք են եղել:

-Բավականաչափ արդյունավետ աշխատանքը խորհրդարանի, արտաքին հարաբերությունների (մասնավորապես հայ-վրացական հարաբերությունների), «Ջավախք» հայրենակցական միության և ԵՊՀ դասախոսական աշխատանքի շրջանակներում: Ընտանիքումս էլ ամեն ինչ խաղաղ է և բնականոն հունի մեջ:

-Բացթողումների մասին ի՞նչ կասեք:

-Բոլոր մահկանացուներս էլ սխալական ենք, կատարյալ միայն Աստված է: Բացթողում չեն ունենում միայն չաշխատող, ծույլ մարդիկ իսկ նրանց կյանքն էլ ամբողջովին բացթողում է:

-Իսկ որո՞նք են 2020թ-ի սպասելիքները, ակնկալիքները:

-Ավագ դուստրս պետք է մագիստրատուրա ընդունվի, կրտսեր դուստրս՝ բուհ: Ցանկանում եմ նրանց բարեհաջող քննաշրջան:

Հանրային կյանքում ակնկալում եմ պետական բյուջեի զգալիորեն ավելացած միջոցների արդյունավետ օգտագործում՝ հանուն մեր պետության և քաղաքացիների բարօրության, մարդու իրավունքների և հիմնարար ազատությունների լիակատար պաշտպանություն, ինչպես նաև արցախյան հակամարտության խաղաղ կարգավորման իրական հիմքի ստեղծում:

Այս ամենի ուղղությամբ նշնակալի գործ է արվել 2019թ-ին:

-Ամանորի խորհուրդը Ձեզ համար:

-Ամանորը ժամանակի հարահոս ընթացքի մեջ մի կետ է, որը ազդարարում է միաժամանակ ավարտ և սկիզբ: Այն մի ուրույն հնարավորություն է՝ վերլուծելու նախընթաց ժամանակահատվածը, վերհանելու բացթողումները, անհրաժեշտության դեպքում՝ վերաիմաստավորելու կյանքը և նոր ծրագրերով ու սպասումներով առաջ նայելու:

Իհարկե նաև հրաշալի տոն է՝ իր հայկական ազգային ու ավանդական դրսևորումներով:

-Որտե՞ղ և ինչպե՞ս եք սիրում դիմավորել Ամանորը:

-Ամանորը միշտ դիմավորում եմ Հայաստանում՝ ընտանիքիս և հարազատներիս հետ:

-Ձեր նախընտրած ամանորյա ուտեստը:

Ամանանորյա նախընտրածս ուտեստը մայրիկիս պատրաստած բացառիկ համեղ տոլման է: Այն այնքան հայտնի է, որ անգամ Վրաստանի խորհրադարանի իմ պատգամավոր ընկերներն են պարբերաբար այցելում մեզ՝ տոլմա ճաշակելու:

-Սիրո՞ւմ եք պատրաստել խոհանոցում և ի՞նչն է շատ լավ ստացվում:

-Սիրում եմ պատրաստել հիմնականում ուտեստներ՝ մսամթերքից և ձկնեղենից: Ճիշտ է հաճախ չի ստացվում, միայն երբեմն հանգստյան օրերին կամ արձակուրդներին, որով կնոջս և երեխաներիս մեծ ուրախություն եմ պատճառում:

-Ի՞նչ սովորություններ ունեք տոնի հետ կապված, որոնք արդեն ավանդույթ են դարձել:

-Շամպայն, նվերներ, բարեմաղթանքներ, խնջույք… սովորաբար ի վիճակի չեմ լինում վերջին հատվածը հիշելու:

-Կարո՞ղ եք հիշել որևէ արտառոց դեպք Ամանորի հետ կապված:

-2004 թվականին Ամանորը անցկացնում էինք Ջավախքում՝ Գանձայի մեր հայրական տանը: Եղբորս հետ որոշեցինք տոնածառի համար անտառից եղևնի բերել:

Անտառապահը նկատել էր և լի էր վճռականությամբ՝ տուգանելու մեզ: Այն ժամանակ ես դեռ պատգամավոր չէի, սակայն ակտիվ էի հասարակական-քաղաքական կյանքում և պարբերաբար երևում էի հեուստատեսությամբ: Պահակը, տեսնելով ինձ, ասաց.

- Ծո՛, դու ինի տելեվիզորին տղան չե՞ս, հանգիստ քնե մա՛նչ ջան, ես քեզի չեմ տուգանե:

-Ամանորյա երազանքներ պահո՞ւմ եք, հավատո՞ւմ եք հրաշքների:

-Ուզում եմ, որ մեր հայրենիքի և պետության սահմանները քայլ առ քայլ, աստիճանաբար նույնանան:

Երազանքները կատարվում են, երբ շատ ես հավատում և ամեն ինչ անում ես դրանց իրականացման համար: Կարծես թե արևմուտքում և արևելքում քոչվորները շատ ծվարեցին մեր հայրենի հողերի վրա:

-Եթե հնարավորություն լիներ ետ տալ ժամանակը, ի՞նչ կփոխեիք Ձեր կյանքում:

-Թերևս շատ բան չէի փոխի: Միայն ուզում եմ, որ այսուհետ թե՛ Հայաստանում, թե՛ Սփյուռքում բոլորս ավելի շատ սիրենք հայոց պետականությունը՝ Հայաստանի և Արցախի Հանրապետությունները:

Բավակա՛ն է սիրենք միայն հայրենիքը: Այդ սերը անպտուղ դուրս եկավ, այդ սերը մեզ տարանջատեց արևելահայի և արևմտահայի, հայաստանցու և սփյուռքահայի, ղարաբաղցու և իջևանցու, երևանցու և ախալքալաքցու: «Հզոր պետություն, միասնական ազգ, ամբողջական հայրենիք». ահա այս կարգախոսը կորդեգրեի:

-Ձեր ամանորյա մաղթանքը:

-Նախևառաջ խաղաղություն, նախևառաջ սահմանին կանգնած զինվորի և սպայի համար, հետո՝ մնացածը:

Hayacq.com